林俊其追求马晓晴失败 跟男神余德丞学嘢
"翻版王浩信"林俊其近日孖住男神余德丞（Dickson）主持J2节目《真．女神转身》，每集同唔同网红女神约会，并进行大比并，最终由女神二拣一选出心仪男士，昨晚（2日）首播就请到香港花式熘冰女子运动员马晓晴，佢不但喺熘冰界获奖无数，仲系学霸一名，先后修读美国麻省大学嘅传播与媒体研究课程及运动管理系硕士，加上长相甜美，甚至获日本媒体封为"港版石原聪美"，女神之名当之无愧！而昨晚一集，两位男主持同女神买衫、食饭兼熘冰，Dickson更施展强大冧女招式跪地表白，虽然林俊其画上同款纹身示爱，但都不敌Dickson，最后马晓晴情倾Dickson，2人喺熘冰场上一杯嘢饮两份饮，相当浪漫。
林俊其接受东网访问，笑言自己系"单身狗"，跟Dickson学咗唔少冧女技巧，但就认为如果真实拍拖并唔需要咩招数，最紧要系付出真心。而讲到首次做综艺节目主持，佢就表示起初收到消息时都担心自己不能胜任，幸好拍档Dickson在旁鼓励及扶持，佢又指今次最开心系尝试咗唔少"第一次"："好多中学生拍拖实会一齐约会去熘冰，但我就冇试过，所以咁大个仔有机会比我玩，仲要由一个花式熘冰嘅香港代表亲自教我，呢件事真心正！之后仲有好多嘢都系第一次喺节目入面做，我个人专长唔多，但好锺意乜都试乜都玩，系个节目畀我发掘新世界扩阔咗视野。"
