传受婚姻压力爆煲求医 陈自瑶：我冇事！
艺人陈自瑶（Yoyo）今日（23日）为热播剧《把关者们》宣传，有指她疑因婚姻压力爆煲搞到情绪崩溃，之后愁爆到自然疗法医疗中心求医，Yoyo直指此说法好好笑，又澄清没有情绪崩溃："写到咁大！我好好，多谢大家关心！"
她解释中心是朋友开设，当日只是快闪攞嘢，但她承认有接受"髗骶骨治疗"，不过并非如报道所说的治疗心理及情绪病："间中心我去咗好多年，身边嘅朋友都知我好注重养生，做治疗系养生、美颜，系保养功效，唔系报道写到要求助！（吓亲身边人？）系呀，个个都关心我有冇事，我冇事！"
Yoyo表示报道中有张她讲电话相，就被写是一脸愁容找朋友倾诉："讲亲电话就系咁？嗰阵我系问紧朋友边度买生日蛋糕，当日有朋友生日。（以后笑住讲电话？）咁样好难喎！哈哈！佢哋应该影咗100张相，然后拣咗呢张相，或者我尽量24小时都笑住讲电话啦！亦有张相系几个月前同经理人食Tea，又讲我搵朋友倾诉，我真系冇事，多谢大家关心！"
她打趣说自己近日经常出席活动，如果情绪严重都会"现形"："我似有问题咩？（唔知你系咪对人欢笑背人愁。）我状态咁好，就系好好嘅回应！"
